s' Laufner Fasnachts Variété
s' Räbeli

Di letschti Prömiere schtoht vor dr Tür

DSCF3786a

Vor ere wunderschöne Circus-Kulisse, wo o das Johr vom Kurt Sigrist liebevoll und mit viil Engaschemang gschtaltet worde isch, wird am Samschdig, em 26. Jänner, also i zwee Dääg, die neuii Räbeli-Seesong eröffnet. Wie immer, alli siibe Vorfiehrige si usverchauft und keini Biileet me z'ha. Höchschtens uf em Schwarzmärt!



O s'letschte Räbeli wird sich "liebevoll" dr Servela-Prominänz aanäh. Es chömme nonemool so zimmlich alli Figure us dr nöchere Vergangeheit vom Räbeli zum Zug. Aber o neui, schprich früschgwählti, Laufener chönne nid sicher si, öb's es se breicht.
S'Räbeli hett aber o e Riisefröid, ass es glunge isch zwee Special Guest chönne z'engaschiere, wo z'Laufe wohlbekannt si. Dr einti Gascht hett zum Abschluss no chönne d'Sitte wächsle und isch vom Süschee-Lieferant zum Ensemble übere gwächslet. Dr Zwöite Gascht hett als Bueb si erschte Ufftritt a-me-ne Clique-Obe i dr Feschthalle gha und chunnt nach 29 Johr wiider zu de Uschprüng z'rugg. Mir freue eus riisig druf.

 

S'Räbeli wartet o das Johr mit eme kunterbunte Programm uf. Zum letschtemool s'Räbeli-Orcheschter, s'Ensemble und die bewährti Technik, wo eus tipptopp ungerschtützt. Zum letschtemool im Räbeli, dr Raphi und dr Jölle und zum erschtemool und gliichziitig zum letschtemool "Anschi und Tschenny" mit ihrer amtemberaubende Bodeakrobatik.
Zum letschtemool dörfe mir euse Schponsore, Gönner und süschtige Hälfer zeige, ass ihr Engaschemang guet inveschtiert isch.

Danggschön und e Huffe Fröid bim Räbeli-Circus, i dr Maneesche vom alts Schlachthuus.

rm/jö

 

 

2016 © Räbeli - s' Laufner Fasnachts-Variété