s' Laufner Fasnachts Variété
s' Räbeli

Jetz ruggt's em

Wo-ni geschter i d’Aula vom Baselschtroos-Schuelhuus cho bi, si do alles so koschtümierti Gschalte umme gschwiirt. „Isch denn scho Fasnacht“, ha-ni dänggt? Und i ha mi Larve no-ni fertiggmoolt!
Nei verdelli, es isch hütt' jo lange Proobedaag vom Räbeli-Ensemble, wo vom Zwölfi z’Midaag bis z’Obe ca. am Föifi gange isch.

Alli Sketsch‘s und Rahmeschtüggli si draa gno worde bis dr Reschissör z’Friide gsi isch. Gärn hätt i no e paar Föteli do uf d’Hompeitsch glade, aber grad im letschte Momänt ha-ni gmerggt, ass drmit scho e Huffe verroote wer. Jä und jetz isch no dr nechschti Sunndig zum proobe und denn goht’s bereits is Schlachthuus uf d’Bühni.
Mir freue eus druff.

O bim Räbeli-Orcheschter lauft alles beschtens. Natürlich bruuche si die Daage, wo no chömme, zum Witterproobe und denne chömme o sii, wie o d’Pfluderi-Fäger, d’Chummerbuebe und alli die, wo no mitmache (wo mir aber nid säge wei, wär!) is Schlachthuus cho proobe. Und denne goht's zue wie im Himmel vorusse.
Am Sunndig z’Obe wärde bereits d’Kulisse ufgschtellt und d’Technig foht a, sich i’zrichte.
S’git für alli Protagonischte zwo intensivi Wuche. Mir mache das aber gärn, drmit dir liebs Publikum denne chönnet drei Schtung unbeschweert im Circus Räbeli verwiile.
Am Fridig, em 25. Jänner isch dr Schtart, mit dr Generalproobe.

Und denne heisst’s:

                                                    H e r e i n s c h p a z i e r t

i Circus Räbeli!

                                                    Maneesche frei!

2016 © Räbeli - s' Laufner Fasnachts-Variété