s' Laufner Fasnachts Variété
s' Räbeli

s' Räbeli 2007

 



>> und do goht's grad is Fotti-Album vo denn

IMG_0119_jpg
IMG_0090_jpg
IMG_0126_jpg
IMG_0100_jpg
IMG_0024_jpg
IMG_0088_jpg
IMG_0021_jpg
IMG_0142_jpg
IMG_0167_jpg
IMG_0200_jpg
IMG_0130_jpg
IMG_0056_jpg
IMG_0180_jpg
IMG_0003_jpg
IMG_0204_jpg
IMG_0156_jpg
IMG_0087_jpg
IMG_0048_jpg
IMG_0153_jpg
IMG_0036_jpg
IMG_0117_jpg
IMG_0192_jpg
IMG_0114_jpg
IMG_0066_jpg
IMG_0164_jpg
IMG_0166_jpg
IMG_0138_jpg
IMG_0112_jpg
IMG_0005_jpg
IMG_0072_jpg
IMG_0084_jpg
IMG_0104_jpg
IMG_0185_jpg
IMG_0202_jpg
IMG_0082_jpg
IMG_0013_jpg
IMG_0006_jpg
IMG_0149_jpg

 

S’Räbeli 007

O für das Johr hei mir vom Räbeli eusi Schpione und Agänte usgschiggt, um use z’finge, was z’ Laufe und i dr Umgäbig alles eso passiert isch. Wär hett wäm was gmacht, oder ebbe grad nid gmacht?! Wär hett gmeint, euse Agänte entgoht öbbis? Wär hett g’hofft eusi Schpiön deche nüt mergge? Falsch dänggt!! D’Räbeli-Macher si fündig worde – und wie!
Natürlich hett dr Schtadtroot und sini Ungergäbene alles dra gsetzt, um wiider „Räbeli-würdig“ z’si. Do hei sich doch gwüssi Vorkommnis diräggt ufdränggt. Mir wei do nid z’viil verroote, aber ass Laufe e Wasser-Problem hett, isch de Bsuecher vom Schwümmbad und de Aawohner vom Bleiholle-Quartier nüt Nöiis. Aber nach em Läse vo däm Programm und nach dr Uffiehrig wüsset Dir’s. Denn isch’s o klar, wär’s süscht no i s’ Programm vom Räbeli 007 gschafft hett.

S’ „James-Blond-Tiim“ und die viile Hälfer us dr Agänte-Szene wärde e Obe lang versueche Liecht i gwüssi Vorkommnis z’bringe: wär für was und werum dr Chopf muess ane heebe! Mit allne – o mit unkonventionelle – Mittel wird do spioniert, ufklärt und intrigiert. So wie im richtige Läbe!
Und ei Hauptthema isch wie ne rote Fade im Gscheh vom hüttige Obe: cha dr Mörder vom Räbeler überfiehrt wärde, oder zieht dä Verbrächer wie dr Fantomas eimool mehr dr Chopf us dr Schlinge? Mir wärde s’ ghöre und vor allem gseh.

Und wie immer – hett s’ Programm und drmit s’Räbeli 007 e Ändi. Mir hoffe aber, ass mir aaschliessend im Bistro oder a dr Bar no chönne e chli mitenanger plaudere und zämmehogge.

E intensivi und ufwändigi Ziit goht mit dr Première für eus Räbeli-Lüüt z’ Änd. Nachdäm mir i ville Schtunge das erfunge, konzipiert, kreiert, zämmegsuecht und g’iebt hei, wo mir Euch hütt do presentiere, hoffe mir natürli o, ass eus d’Theme und d’Umsetzig drzue glunge isch, und Dir alli Fröid heit am Räbeli 2007. Euche Applaus zeigt eus, öb’s rächt isch wie mir s’ Thema inszeniert hei. Euche Applaus isch eus Belohnig und Aaschporn für wiiteri Tate.

Mir vom Räbeli wünsche euch e paar heiteri Stunge, e huffe Schpass und


v i i l   V e r g n i e g e  !



Iisatzplan Räbeli 007

S’ Begräbnis vom Räbeler   
No isch är nid ungerem Bode..
E Gheimnisvolli Sach, das mit däm Räbeler-Mord

007-Räbeli-Song   

Wie jedes Johr - o das Mool perfeggt em Thema aapasst, d'Räbeli-Macher mit em Räbeli-Orcheschter und mit reizender Ungerschtützig vo de Röschenzer Bond-Görls. D'Eröffnig vom Oobe.

Me suecht e Mörder   
Zwo bekannti Figure, nämmli d’ Miss Makel und dr Inschpäggter Chalanggoh bim ufkläre vom Räbeler-Mord. Nach däm truurige Ändi vom Räbeli 06, wo dr Räbeler erstoche worde isch, versuecht die ufgweggti Miss Makel mit em öbbis schusselig wirggende Inschpäggter Chalanggoh sit eme Johr die Untat ufz’kläre. Bis jetz leider ohni Erfolg. Dr letschti Aalauf, Liecht i die dunggli Affäre z’bringe, wird dorum hütt z’Obe gno, si doch alli Verdächtige do im Schlachthuus aawesend und chönne vo euse Ermittler vernoh wärde. S’ Publikum wird bätte, d’ Identitäts-Charte, Päss oder Fiehreruswiis barat z’halte. Es muess o drmit grächnet wärde, ass verdächtigi Persone mit uf dr Poschte gno wärde, drmit wittere Abklärige troffe wärde chönne.
Ohni Rüggsicht uf Verlüscht wird ermittlet, ass es chracht und es isch z’hoffe, ass es deene Zwöine wirgglich g’lingt, dr Täter dingfescht z’mache und sinere gerächte Schtroof zue z’fiere.
Darschteller:

Miss Makel: Marisa Hänggi
Inspäggter Chalanggoh: Fabrizio Scordari

OctoTussi   
E Bligg hinger d’ Kulisse vom James Blond sine Ermittligsmethode.
Mir träffe dr James Blond bi sinere Lieblings-Beschäftigung a. Waseli was ächt? Natürlich bi dr Verfiehrig vo-ne-re schöne Frau! Oder isch’s ächt umgekehrt? Uf jede Fall versuecht dr James sinere Gschpiilin gwüssi Gheimnis z’entlogge – oder isch’s scho wiider angerscht ume? Oder isch’s am Änd überhaupt ganz angerscht? Mir wei emool luege..
.. seid dr Baselbieter, wenn är sett zue öbbisem Schtellig näh. Und will schliesslich im Kanton Rotschtaab jo nöchschtens wichtige politische Entscheidige aaschtöh, isch’s nit abwägig aaz'näh, ass gwüssi Chreis versueche s’Räbeli für ihri Ziil und Wünsch z’missbruuche!
Darschteller:

James Blond: Lorenz Borer
E Möchtegärn-Landrötene: Petra, ääh, Margrit Martina-Wey                               
Kurt Tschan: Thomas Marolf


E Verfolgigsjagd   

Kei Agänte-Epos ohne e weritabli Verfolgigsjagd. Und ohni Verfolgigsjagd isch dr James Bond kei James Bond. Also hei mer halt e deftigi Verfolgigsjagd is Programm ufgnoh. So richtig mit Äggschen und so.


Dambuure-G’fächt   

D’ Pfluderi-Fäger-Dambuure mit em schlaagende Bewiis, ass s Drummele gfährlich isch..
Ass d’ PFL’99 guet chönne drummele isch glaub  allne bekannt. Jä, aber was mache die jetz dört uf dr Bühni? Sie die vom James-Blond-Fieber aagschteggt worde, ass die sich uf dr Bühni duelliere? Die si jo diräggt agressiv.
Und bim zwöite Marsch wird’s no schlimmer, jetz wärde si no handgrifflich!
Der erschti Marsch heisst tatsächlich Duell und isch vom Alex Häfeli und
d’ Schlegelfächt-Tagwach, s’zwöite Schtügg, hett dr Fritz Berger gschriibe.


Nonemool e Verfolgigsjagd   
Wär verfolgt do eigentlich wär. Nid immer isch dä wo z’ vorderscht isch dr Held
Es mache mit:

E Chueh wo em Viehdoggter abghaue isch
Dr Viehdoggter und dr Buur


In „tödlicher“ Mission   
E Rahmeschtüggli über e nööis Mitgliid vom Schtadtroot, wo si Ufgoob sehr ärnscht nimmt.
Chuum gwählt, und scho im Iisatz im Dienste seiner Majestät, em Laufner Schtadtroot. Was de so alles chasch erläbe, wenn de muesch dr Sicherheits-Chef vo Laufe verträtte und wenn de denn no entsprächend aagleit bisch für die nid alltäglichi „Mission impossibel“, muesch scho schtarggi Närve ha.
Es wer aber schad, wenn mer do scho würde d’Chatz us em Sagg loh, resp. würde s’Fäll vom Bäre verteile, bevor är gschosse isch.
Losed und lueget und schtuunet, was eme pflichtbewusste Laufener Schtadtroot so alles passiere cha. Und dängge si dra – hinger jedem Schtadtroot schtoht e schtarggi Frau – gelled si!
Es schpiile:

Hanspeter Ginter: Rainer Meyer
Tuurischt us Bayern: Thomas Marolf
Räbeli-Macher: Patrik Hänggi
E Bärschblere: Karin Schmidlin
Charlotte Ginter: Ursula Ramstein-Rem

Ufklärige und Entlarvige   
Nonemool die zwe gliiche Ermittler uf dr Suechi nach däm oder deere, wo dr Räbeler umme Egge brocht hett.


Im Geheimdienscht Ihres Comités 
  
Pfiffe und drummle i dr klassische Form, darbotte vo dr Pfluderi-Fäger-Clique.
Festival heisst ihre nöii Marsch wo eus d’ Pfluderi-Fäger hütt z’Obe zelebriere. Es isch e klassisiche Dambuure und Pfiffer-Marsch, wo mir sicher a dr kommende Fasnacht no mehrmools wärde ghöre.
Es tönt halt doch saggschtargg, drummele und pfiffe. Aber ohni Nochwuchs hört das glii uf. D’PFL sueche Männli, Wiibli, Buebe und Mäitli wo gärn wei drbii si, a dr Fasnacht z’Laufe. Öb de’s scho chasch und gärn wiider wotsch mitmache; öb de’s neu muesch/wotsch lehre – mäld di doch bi de PFL, die hogge immer no e chli umme, nach em Räbeli oder a dr Fasnacht. Dr Dirk Hamburger isch dr Presidänt; chasch di unger dr Nummere 079 361 44 75 aamälde und scho bisch im Gheimdienscht Ihrer Clique!


Schnitzel-Bond   

Euse Huusbangg in Äggschen.
Do mir das Johr kei extärne Schnitzelbangg hei chönne für e Ufftritt gwünne, mir vom Räbeli aber s’Gfühl hei, e zümpftige Bangg ghört derzue hei mer churzerhang eine beschtimmt, wo das „Näbeamt“ no übernäh muess. Mir wüsse aber, ass das Trio bängglerisch vorbelaschtet isch und mir se ruehig uf euch dörfe losloh.
Was si bringe und wär is Fadechrüz vo ihre Värsli cho isch, das ghöre mir hütt us erschter Hang.
Wär sich unger dr Larve verschteggt, tuet me bi-n-eme Bänggler nid verroote ... O wenn me sich i dr Laufner Fasnachts-Szene guet kennt.
(Die Bänggler singe unger eme angere Name und mit ere angere Melodie o a dr  Laufner Fasnacht)

Der Spion der mich liebte
Typisch James – cha keinere Frau widerschtoh. S’ Angel, e richtigs Parti-Göörl, isch bim Liana im chline Beizli z'ungerscht im Schtedtli eine go Zwitschere..
Do plötzlich goht d’ Tüüre uf und wär isch do GOing-IN.. ganz ellei und schpöder GOing-out mit ere tolle Begleitig..?
Wies witter goht säge Euch:

Liana, d’ Barmaid: Margrit Martina-Wey
Angel, e Parti-Göörl: Ursi Ramstein-Rem
James Blond: Lorenz Borer


Lilly Davidson   

Eini vo eusere Schtadtröötene bim fröne vo ihrem Hobby verwütscht
D’ Agänte und Schpiön vom Räbeli hei vom grosse Unbekannte dr Uftraag übercho, eusi Schtadtröötene und Schtadtrööt us z’schpioniere und ihri Mödeli, Liideschafte und Sehnsücht z’rapportiere. Und si si fündig worde.. und wie!
Schtellverträttend für alli Siibe, hei mer die nachfolgendi Szene usgwählt.

Lilly Davidson: Karin Schmidlin
D’ Live-Schtimm fürs Play-Bäck: Corinne Waldner

   
Mir mache e Pink(el) Pause –
S isch Ziit für e Pink(el) – Pause und nochhäre für e zümpftigi Abchielig!
Mit em Pink Panther


Gold-Larve   

D’ Pfluderi-Fäger pfiffe uf e James Blond. Tatchreftig ungerschtützt vo de gliichnamige Dambuure.
D’ Pfiffer und d’ Dambuure vo de Pfluderi Fäger hei sich zum Thema 007 öbbis Schpeziells usdängt und für eus e Melodie-Reige us de James-Bond-Filme iischtudiert.  
Dr Toni Cueni hett das Medley für d’ Pfluderi-Fäger-Clique arrangiert und d’ Literatur drzue gschriibe.
Lose mir doch emol zue wie d’ Pfluderi-Fäger em James Blond dr Marsch bloose.

Rutsch niemals nie   
S’ zwöite Rahmeschtüggli – diräggt us em Schwümmbad
Dr Schtadtrot vo euserer Gmeini hett’s sich nit loh näh, höchscht persönlich die nöii Rutschbahn im schtedtische, g’heizte Schwümmbad no vor dr Eröffnig teschte z'welle und emool uf em eigene Fudi d’Rutschbahn abe z’rütsche. Das das nid eso eifach isch, isch glaub jedem klar, schliesslich isch jo jede so vo sich überzüügt, ass dr Badmeischter alli Häng voll z’tue hett, ass dä Chinge-Garte nid us uferet.
Wie üblich, isch’s Räbeli natürlich Züüge worde vo däm einmalige Schpeggtagel.

Badmeischter Mathias: Patrik Hänggi
Brigitte Bos: Marta Maggio
Walther Bucher: Lorenz Borer
Lilly Kuonen: Karin Schmidlin    
Anja Suter: Ursula Ramstein-Rem
Petra Studer: Margrit Martina-Wey
Hanspeter Ginter: Rainer Meyer
Peter Jäckle: Jörg Heizmann
E Schwimmbad-Agestellte: Thomas Marolf

 

Es goht witter mit Entlarve
Eusi zwe „Ufklärer“ si no immer uf dr Pischte; jede isch verdächtig.

Dr. Nö und si Bisser.
Zwe unheimlichi Figure – nid numme us dr Bond-Szene.
Mir träffe zwe wo s’ nid chönne lo si, uf ihrem Usflug is Schtedtli (jetz Schtadt). Und will’s z’ Laufe ei Bauschtell a dr angere hett, chömme si is tröime..! Ämmel eine drvo.
Was dä nid alles wott mache – das gränzt bereits a grössewahnsinnigi Wissione!
Für Euch uf dr Bühni:

Dr. Nö: Daniel Neuschwander
Beisser: Jörg Heizmann
Betreuer: Thomas Marolf

Salme Schteibruch   
E Huffe Chlötz, Schiifer, viil Chiis und Schotter us eme Laufner Bangge-Schteibruch… E fätzige Hochkonjunktur-Song us em Baselbiet!
So losed doch was der Lorenz Trottmann und dr Patrik Hänggi us em Baschi gmacht hei:

Musig: Räbeli-Bänd
Gsang: Patrik Hänggi und Rainer Meyer

E Indizie-Bauschtell   
Es wird witter ermittlet und umegschneugt
Si finges eifach nid use, die zwöi Chiffler.

Casino Söischtall
Dr James i sinere obligate Casino-Rolle. Wär zieht är das-mool übere Tisch?
Z’ Laufe passiere scho sältsami Sache: plötzlich hesch so ne Frässzödel a dr Tüüre hängge mit komische Aawiisige – falls de im Bleiholle-Quartier wohnsch. Do muesch schiints im Champagner bade, zum Zmorge e Schtange tringge, mit Whisky d’ Zehn putze und alles so kommisch Züüg. Numme Wasser dörfsch keis me bruche..!
Dangg euse guete Beziehige hei mir o usegfunge wie eso-ne Wasserverschmutzig z’schtang chunnt. Und ass es bim Pokere immer e Verlierer git, isch bekanntlich o nüt nöiis.
Und wie immer, s’Räbeli hett natürlich e Schpion am Tatort.
Darschteller:    

Brunnmeischter Rieder: Daniel Neuschwander
James Blond: Lorenz Borer

Desperate Housewifes   
A nere Wasserschtell' zmitts i dr Bleiholle, si e Hampfle verzwiiflete Huusfraue bim Wasser hoole.
Jetz isch natürlich dr Zapfe ab, resp. dr Wasserhahne zue. Was mache jetzt die verzwiiflete Huusfraue us dr Bleiholle? S’ Räbeli hett natürlich e Notlöösig für die plogte Dame usegfunge.
Mir si eimool mehr drbi, wenn sich d’ Crème de la Crème vo dr Bleiholle bim Wasserhole am Diebach unge zum-ene Schwätzli trifft. Es chunnt do eis und s’angere zämme, wenn die verzwiflete Huusfraue ihri Sorge zum Beschte gäbe.
Und plötzlich isch do e ungerschwelligi Verdächtigungswälle im Gang. Aber scho guet, es git e Lösig und schlussändlich isch dr Friide i dr Bleiholle dank eim Maa g’rettet..    (siehe nächschter Programm-Punkt)
Eusi Huusfraue:

Rosemarie Cueni: Karin Schmidlin
Heidi Blunschi: Margrit Martina-Wey
Cornelia Steiner: Ursula Ramstein-Rem
Bernadette Heizmann: Marta Maggio


Liebesgrüsse aus der Bleiholle
S Huusballett bim Rägetanz, äääh, bi dr Hommaasch a ne grosse Laufner Retter.
Ende gut alles Gut und wär isch dr grossi Fründ vo de Huusfraue us dr Bleiholle? Wäreliwär? Dr Max ischs, jo dä mit em Wey-Wasser

D’Ufklärig vom Räbeler-Mord   
Jetz goht’s eim a Chraage
Dr Fall wird doch no glööst. E riisigs Schtuune erfasst alli Zueschauer, Darschteller und sogar d’Reschie. D’Chueh, reschp. dr Räbeler isch dä Missetäter. Är hett alles numme vortüüscht. Dr Mord isch gar keine. Är hett welle Süschees fürs Räbeli kreiere. Wie wenns nid gnue geb, do z’Laufe. (Für was hei mer eigentlich dr Schtadtroot!!!!!). Dr Delinquänt wird verhaftet und chunnt e läbenslangi Schperri fürs Räbeli über. (Aber was heisst scho läbenslänglich?!)

Aschliessend goht nahtlos zum Finale übere:

Blond-Räbeli-Finale   
Dr klassisch Schluss vo jedem Räbeli, mit allne wo mitgmacht hei. Und wo sich gärn der Applaus vom Publikum iinezieh. Wirgglich mit allne..?

Mir dangge eusere Schponsore...

  • Raiffeisenbank Regio Laufen, 4242 Laufen
  • Ricola-Vertriebs AG, 4242 Laufen
  • BDO Visura, 4242 Laufen
  • Basler Versicherungen, 4242 Laufen
  • Müller Bau AG, 4242 Laufen

 

…und euse Gönner und Hälfer

  • em Roland Niederberger, Bäckerei und Café, für d’ Pause-Überraschig, wo mer hei chönne günschtiger iichaufe
  • de Lufthüler-Waggis fürs Hälfe am Empfang
  • em Jan Andres us Laufe fürs Bediene vom Vorhang
  • em Jeannette Heer fürs schniidere vo verschiidene Koschtüm
  • em Toni Cueni für s’Arranschiere vo de Pfluderi-Fäger ihrem Bond-Medley
  • em Gerold Nussbaumer fürs Aafertige vom Beisser sim „Schtahl-Gebiss“
  • em Rodrigo Hänggi für sini Computer-Animazione
  • allne deene, wo uf irgend e Art mitgholfe hei, ass mir euse Aalass chönne duurefiehre.
  • allne, wo aagschtange si und drmit zeigt hei, ass ihne s’Räbeli öbbis wärt isch.
  • em „alts Schlachthuus“ für’s Gaschträcht
  • e ganz e schpezielle Dangg
    • em Kantonsspital Laufe fürs Probelokal
    • dr Firma Garage Lanz, Breitenbach und dr Firma AVB Autovermietig, Reinach, für d’ Gratis-Usschtellig vo de Bond-Cars.
    • dr Firma Trovanti, für d’Transpört und für d’ Benützig vom Büro für eusi Probe
    • em Bruno Stähli, eusem DVD-Filmer
    • und nit z’letscht de Dame vom Turnverein Röschenz für die schpontani Zuesaag und für die reizendi Ungermoolig vom Programm

Adiö zämme. S’Räbeli chunnt wiider im Johr 2008 mit em Motto:

E Laufner Fasnachts-Märli

c:Jö

 

facebook1

2016 © Räbeli - s' Laufner Fasnachts-Variété