s' Laufner Fasnachts Variété
s' Räbeli

s' Räbeli 2001

Get Adobe Flash player

brauereichller 2001

's allererschti Räbeli

Entschtange isch s'Räbeli an-ere Fasnacht, so zimmlich gege Morge ane, inere Fasnachtsbeiz do z'Laufe. Dr Rainer und dr Lorenz hei feschtgschtellt, ass e kulturelli Bericherig vo dr Laufner Fasnacht nötig isch. Die Zwee hei do ane Vorfasnachtsveranschtaltig dänggt. Im Herbscht 1999 isch den dr Verein s'Räbeli gründet worde. Dr ganzi Verein beschtoht hütt no numme us em Vorschtang. A dr Gründig mitbeteiligt si dr Rainer Meyer, dr Lorenz Trottmann, dr Jörg Heizmann, dr Patrik Hänggi, dr Jeannot Broch und d'Martha Maggio. Alles aggtivi oder ehemals aggtivi Fasnächtler. Die sächs hei sich denne sofort a d'Umsetzig vom Ziel gmacht. Nid ohni vorhär no feschtz'halte ass s'Räbeli e Laufner Fasnachtsvarieté sell si und ass die erschti Uffiehrig sell us Ziitgründe im Johr 2001 schtattfinge.
Nach Verhandlige mit em Brauerei-Chäller-Verein für's Gaschträcht im Chäller und e Huffe schlooflose Nächt mit teggschte, arrangschiere und die nötige Darschteller und Gruppe sueche, isch's denne so wiit gsi. Mir hei am Räbeli 2001 chönne e breiti Palette a Fasnachts- und angere Heileits us Laufe darbiete. Natürlich mit Hoffe und Bange, ass das guet usechunnt.

raebeli 2001

Veranschtalter

S'Räbeli
Postfach 617, 4242 Laufen

 

S'Räbeli-Team danggt em

Brauereichällerverein

für s'Patronat und s'gschänggte Vertraue.

E grosses Danggschön säge mir eusere Schponsore, wo eus finanzielle unger d'Arme griffe hei:

  • Raiffeisenbank Laufen, 4242 Laufen
  • Ricola-Vertriebs AG, 4242 Laufen
  • IG Laufen
  • Erich Lutz, Basler Versicherungen, 4242 Laufen

Witters dangge mir dr

Papeterie Nordschweiz, 4242 Laufen für der Billet-Vorverchauf und dr

Agfrässeni-Clique, Laufen ass mer hei dörfe i ihrem Chäller proobe

 

s'Räbeli-Team
wo s'Programm zämmegschtellt hett

Broch Schano                  Darschteller, Guggemuusiger und Räper

Hänggi Patrik                   Teggschter, Bänggler und Räper

Heizmann Jörg                 Kasse, Requisite und Räper

Maggio Martha                Perügge, Masgge und Räperin

Meyer Rainer                  Teggscht, Bänggler und Räper

Trottmann Lorenz            Teggscht, Arrangschemänt und Räper

Reschii

hei mer sälber gmacht

Bühnibild

Nicole Schnell, Röschenz

Liecht

Jörg Schmidlin, Wahlen

Darschteller

Marisa Hänggi, als Pausengirl
Ursi Ramstein-Rem
Karin Schmidlin
Jürg Kyburz
Schano Broch
Thomas Marolf
Rainer Meyer

s'Laufestäbli, Schnitzelbangg
s'Gliehwürmli, Schnitzelbangg
United Drums alias Schtadtmuusig-Dambuure

 

Räb-Chäschte: Lorenz Trottmann (Leitig und Piano), Antonio Maggio (Schlagzüüg) Steve Grütter (Gitarre)

als Special-Guescht: Peter Bürgin, Zauberer, Gelterkinden

Programm

dr Bühnimeischter
Wäge Pyro-, Chemo- und Eleggtrotechnische Inschtallazione und angere Verpuffige, hei mir dr phenomenali Zauberer, Peter Bürgin, als Bühnemeischter verpflichtet. Är isch dr zwöitgröschti Zauber (1.82m), dr Copperfield sich dummerwiis 1.84m. Will dr Peter aber usgezeichneti Referänze hett, isch är em Copperfield vorzooge worde. Är hetts o gschafft, 4 Vorschtellige ohi Rausschmiss z'schaffe. Ihm si Ufgoob isch es bi kritischi Situazione iiz'griife oder unliebsami Gescht uf si Art vo dr Bühni loh z'verschwinde.

Dr Räbeli-Räp
Das isch's Eröffnigslied vo de Räbeli-Macher, wo vo de Räp-Chäschte ungerschtützt wärde. Es sell do druss e Tradizion entschtoh, ass d'Räbeli-Macher mit ihrem Lied s'Programm eröffne.

Potpurri
D'Laufner Guggemuusig Schwitzchäschte bringe s'erschte fasnächtliche Elemänt is Programm vom Räbeli. Si si 1977 gründet worde. D'Schwitzchäschte zeichne sich vorallem dorin us, ass sie ungere-n-anger sehr guet harmoniere. Angerersiits sii si, wie si sälber sääge, Chaote. Mir wei doch lose, was si so druffhei, die Chaoete.

Umfahrig Laufe
S'erschte Rahmeschtüggli im Programm. Es hett no zwöi. Z'Laufe sells e Umfahrigs-Schtroos gäh. S'Räbeli isch drbii wenn Planer und Handwärker am Schaffe si. Do tummle sich e Huffe Laufner und so uf dr Bühni. Dr Lorenz Trottmann isch binere Zämmekumpft drbii gsi und hett grad miesse dä Teggscht do verfasse. So begeischteret isch är gsi.

Jetz git's grad e Buess
E freii Betrachtig vom höchscht aaschträngende Läbe vo eusem gschetzte Laufner Sicherheitsverantwortliche, em Comandante Max Wey.
Jetz weiss me o, wie är si Lohn verdient.

Gsunge und begleitet vo de Räp-Chäschte

Vorwärts marsch
D'Pfiffer und Dambuure vo dr Pfluderi-Fäger-Clique, dr elteschte aggtive Fasnachts-Clique vo Laufe.
Eusers zwöite fasnächtliche Elemänt. Und mir hoffe, ass sii o wiiterhin am Räbeli mitmache. Si pfiffe und drummele für öis dr Unggle Säm, dr Hanswurscht und dr Hornig.
Mir si gschpannt, was öis die 40-jöhrigi Clique bietet. D'Koschtüm hei si extra fürs Räbeli entworfe.

s'Laufestäbli
hett am Räbeli 2001 sini Première.
E Schnitzelbangg ghört zur Fasnacht und o is Räbeli. S'Laufestäbli hett durs Johr duure Auge und Ohre ufgschperrt, wenn's ame duur's Schtedtli gloffe isch, oder am Schtammtisch eine gschlürflet hett. Wär unger dr Larve schteggt wird nid verroote. Das ghört sich so bi de Bänggler. O wenn me weiss wär's isch, me schwiigt und gniesst.

Während dr

Pause

chasch a dr Bar eine go dringge.

Island in the sun Am-ene troopische Obe im Herbscht 98, hett me z'Laufe s'erschtemool Fässer ghört, wo Muusig mache, wo a Rum und karibische Nächt erinnere tuet. Nach viile Nächthei si denne im 99zgi dr Daag duure öffentlich afo schpiile. Dr Name vo deere Schtiilbänd isch Zapallos. Das heisst lut em Bändliider Hampe Oeschger "Chürbischöpf" und nid ebbe Ziibele, wie me vermuetet hett. Und dr Hampe isch o nid Modäll gschtange.

Useschtuehlete
S'zwöite Rahmeschtüggli am erschte Räbeli. Gschriibe hetts dr Rainer Meyer, wo o grad sälber mitschpiilt. I dämm Schtüggli gohts um drei ächti Laufner Wirtinne, wo e imaginäre Kampf um die beschte Blätz bim Useschtuehle usfiere. Natürlich numme verbal.
Mir hei do s'Luisli vom Törli wo vom Rainer Meyer gschpiilt wird. S'Lotti Zemp wird vom Ursi Ramstein-Rem und d'Frau Kern vo dr Karin Schmidlin gäh. Do isch o dr legendäri Schpruch vo dr Frau Kern a die grossi Öffentlichkeit cho: gället.

IG-Blues
E gsanglichi Iichaufstuur z'Laufe. Do chasch jo fasch alles chaufe, sofärns aabote wird. Dr Vorteil im Schtedtli Laufe isch eidüttig, ass de chasch diräggt vor de Läde parkiere. Muesch numme uffbasse, ass di dr Max nid gseht.
Dr Teggscht isch vom Rainer Meyer und d'Muusig hett dr Lorenz Trottmann arrangschiert. S'Trio Räp-Chäschte isch o mit vo dr Partii.

E drei, e vier
D'Damuure vo de United Drums si vor 29 Johr z'Laufe als Dambuure-Gruppe vo dr Schtadtmuusig gründet worde. Und es git se hütt no! Und wie! Es fröit öis, ass mir die 9 Dambuure hei chönne fürs Räbeli engaschiere. Chömme si doch mit eme Titel als Schwiizermeischter. Si zeige eus, ass me im Laufedaal grad so guet oder no besser als z'Basel ruesse cha.

Dr grossi Brueder
Big Brother isch grad früsch im Glozofon z'gseh (gsi). Das hett natürlich öis zu-me-ne Rahmeschtüggli inschpiiriert. Dr Patrik Hänggi het dr Teggscht gschriibe und gschpiilt hei zwöi Chinge wo vo usse ine Containerli ine gschtuunt hei und ihri Komentär abgäh hei. Es si das s'Ursi Ramstein-Rem und dr Jürg Kyburz.

s'Gliehwürmli
Dr zwöiti Schnitzelbangg am Räbeli 01. Das Trio isch 1993 s'erschtmool uf dr Pischte azträffe und vorallem z'ghöre gsi. Mir fröie öis uff's Gliehwürmli. O do sell nid gseit wärde, wär sich unger dr Larve verschteggt. Inseider wüsses jo doch scho, und die angere wärde se sicher no kennelehre. Vorallem diejenige wo draachömme.

Dr Räbeli-Räp
Dr Schlussgsang bevor alles fertig isch. O dä Programmpunggt sell e Tradizion wärde. D'Räbelimacher tie nonemool ihre Räp singe und tanze resp. hüpfe.
Jo, und denne isch s'Räbeli 2001, s'erschte Räbeli, Vergangeheit.
Aber kei Angscht

mir gseh öis am Räbeli 2002 mit em Motto

Les couleurs de Laufon

© Jö

 

facebook1

2016 © Räbeli - s' Laufner Fasnachts-Variété